НҮБ-ын Цагдаагийн зөвлөх, комиссар Файзал Шахкартай Хууль зүй, дотоод хэргийн сайд Л.Мөнхбаатар өчигдөр /2025.08.14/ уулзаж, НҮБ-ын энхийг сахиулах ажиллагаанд Монгол Улсын “цагдаагийн баг” бүрэлдэхүүнийг өргөнөөр оролцуулах, эмэгтэй энхийг сахиулагчдын тоо хэмжээг нэмэгдүүлэх талаар санал солилцлоо.
Монгол Улсын хувьд энхийг дэмжих ажиллагаанд “цагдаагийн баг” буюу өргөн бүрэлдэхүүнээр оролцох боломжийг бүрдүүлэх зорилгоор 2024 онд Энхийг дэмжих ажиллагаанд оролцох тухай хуулийг шинэчлэн батлуулж, цагдаагийн багийг мэргэжлийн өндөр ур чадвар бүхий албан хаагчдаар бүрдүүлж, орчин үеийн өндөр технологийн иж бүрэн техник хэрэгсэлтэйгээр илгээхэд бэлэн болоод байна.
Одоогоор НҮБ-ын үнэлгээний баг ирэхийг хүлээж байгаа талаар илэрхийллээ.

Уулзалтын үеэр НҮБ-ын Цагдаагийн зөвлөх, комиссар Файзал Шахкар “НҮБ-ын энхийг сахиулах ажиллагаанд Монгол Улсын оруулж буй хувь нэмрийг өндрөөр үнэлж буйгаа илэрхийлж, ирэх 10-р сард НҮБ-ын үнэлгээний багийг Монгол улсад илгээх, ШШГЕГ-ын бүрэлдэхүүнийг энхийг бэхжүүлэх үйл ажиллагаанд оролцуулах боломж байгаа талаар, энхийг сахиулагчдад эзлэх эмэгтэйчүүдийн хувь хэмжээг 25%-д хүргэх талаар” хэллээ. Мөн тэрээр НҮБ-аас хоёр жил тутамд зохион байгуулдаг Цагдаагийн дарга нарын уулзалт 2026 оны зургаа дугаар сард болох бөгөөд тус уулзалтад оролцохыг, НҮБ-ын цагдаагийн байранд айлчлан ирэхийг урилаа.
Монгол Улс 2002 оноос хойш хүн төрөлхтний энхтайван, аюулгүй байдлыг сахин хамгаалах, энхийг дэмжих ажиллагаанд 20 мянга гаруй энхийг сахиулагчдаа дэлхийн халуун цэгүүдэд илгээгээд байна.