Ниймгийн ажил гэдэг нь эмч, санхүүч, багш гэдэгтэй нэгэн адил мэргэжил юм.

Монгол Улсад Нийгмийн ажилтнаар сургаж байгаа 14 их, дээд сургууль бий. Өнөөдөр 4000 гаруй нийгмийн ажилтан 7-8 салбарт ажиллаж байна.

Нийгмийн ажилтны хэрэгцээ шаардлага өндөр орнуудын нэг нь монгол. Тэд ихэвчлэн хүүхдийн болоод гэр бүлийн хүчирхийллийн “Улаан фронт”-д ажиллаж, өөрийгөө хамгаалж чадахгүй болсон эмзэг бүлгийн иргэдтэй нүүр тулж ажилладаг.

Халамжид хамрагдаж буй хүмүүс олон янз. Хөгжлийн бэрхшээлтэй, бие даан амьдрах чадваргүй ахмад настнууд гээд. Эдгээр хүмүүсээс давуу талыг нь хөгжүүлж чадвал хөдөлмөр эрхлэх нөөц бололцоотой нь цөөнгүй. "Нийгмийн ажил" мэргэжлийн гол үнэ цэн нь энэ давуу талуудыг нь илрүүлж, нөхцөл байдлын үнэлгээ хийснээр ирээдүйд амьдралдаа эзэн болох алхам руу нь хөтөлж, сайн сайхан амьдрах үндсийг нь суулгаж өгөхөд оршдог.

Энэ бол “ХАЛАМЖААС-ХӨДӨЛМӨРТ” бодлогын чухал хэсэг.

Гэтэл өнөөдөр багш, эмч нарын асуудлаар төр том шийдвэр гаргахад сургууль, эмнэлгийн нийгмийн ажилтнууд хамрагддаггүй, салбарын асуудлаас орхигддог. Тиймээс нийгмийн ажилтнуудын нэгдсэн эрх зүйн байдал, нийгмийн хамгааллын асуудлыг хуулиар тогтоох шаардлага бий болсон тул О.Саранчулуун нарын 24 гишүүн Нийгмийн ажлын тухай анхдагч хуулийн төслийг боловсруулж, 2025 оны арванхоёрдугаар сарын 18-ны өдөр УИХ-д өргөн барилаа.

Нийгмийн ажлын үйлчилгээг хуульчилснаар нийгмийн ажилтан гэж хэн болох, хаана, юу хийх ёстой нь тодорхой болно. Нөгөөтэйгүүр Мэргэжлийн холбоо, сургалт, лиценз шалгалт, нийгмийн баталгааны асуудлууд цогцоороо тусна.

Тодруулбал,

Хуулиа дагаж Нийгмийн ажилтны мэргэжлийн холбоо байгуулагдана. Энэ нь мэргэжлийн ёс зүй, үйл ажилагаагаа тогтоож, салбар дундын зохицуулалтыг хариуцах замаар тогтолцоог сайжруулахад чухал үүрэгтэй.

Ниймгийн эмзэг бүлэгт тохиолдож буй асуудлууд руу хамгийн түрүүнд хэн ордог вэ? Энэ бол НИЙГМИЙН АЖИЛТАН. Гэтэл энэ мэргэжилтнүүдийн асуудал өөрөө хүнд байдаг. Өөрөөр хэлбэл ажил үүргээ гүйцэтгэхэд хамгаалалтын асуудал, нийгмийн баталгаа маш сул тул уг хуулиар шийдэж өгөхөөр зорьж буй аж.

Олон улсад нийгмийн ажлын мэргэжлийн стандарт, хууль дүрэмтэй. Зарим орнууд Нийгмийн халамжийн тухай хуультайгаа уялдуулж Нийгмийн ажлын тухай хуулиа боловсруулсан байдаг бол зарим нь Эрүүл мэндийн тусламж үйлчилгээний хуулиндаа нэг хэсэг болгон оруулдаг.

Харин Монгол Улс Холбоо, сангийн хуулиа түшиглэн, нийгмийн ажил мэргэжлийн түвшинд хүлээн зөвшөөрөгдөх, хүүхэд, өрх, бүлэг, олон нийтэд чиглэсэн нийгмийн хамгаалал, халамжийн үйлчилгээ илүү тогтолцоотой болох, ниймгийн ажилтны эрх, үүрэг, хариуцлага тодорхой болох, мэргэжлийн ёс зүй, стандартаа мөрддөг болох өөрчлөлтийг авчрах Нийгмийн тухай анхдагч хуулиа боловсруулжээ.

УИХ-ын гишүүн О.Саранчулуун:

Өвдсөн хүн бүрт эмнээс гадна сэтгэлийн эмчилгээ хэрэгтэй. Амьдралын хүнд нөхцөл тулгараад байгаа хүмүүст даван туулах, өөрийгөө сэргээх, мэдлэгжих хэрэгцээ бас бий. Энэ бүх хэрэгцээг нийгмийн ажил өгдөг. Өвчин эмгэгээс болж бие даах чадвар, зан үйлийн хувьд эрсдэл учирдаг тул энэ үүрэг оролцоог эрүүл мэндийн салбарт нэвтрүүлэх замаар тэлэх хэрэгтэй байгаа юм. Эдгээр төрлийн үйлчилгээг томьёолон нэмж, бүрэн утгаар нь хэрэгжүүлэхийн тулд салбар дундын уялдааг хангах Мэргэжлийн холбоог байгуулах зохицуулалтуудыг тусгалаа.

Нөгөөтэйгүүр нийгмийн халамж, үйлчилгээг гардан гүйцэтгэж буй хүмүүс нь нийгмийн ажилтнууд. Тэд өдөр бүр улаан фронтод ажилладаг. Тэд 4000-уулаа. Атал мэргэжлийн тодорхойлолт, цалингийн зэрэглэл, ахиж дэвших үе шатууд нь өөр бөгөөд тодорхой бус. Эдгээрийг нарийвчлан зохицуулж өгсөн.

О.Саранчулуун: Нийгмийн ажлын үнэ цэн "ХАЛАМЖААС ХӨДӨЛМӨРТ" бодлогын чухал хэсэг байхад оршино