Монгол Улсын Их Хурлын дэд дарга, Монгол–Чехийн парламентын бүлгийн даргын хувиар УИХ-ын гишүүн А.Ариунзаяа, Р.Батболд, Б.Мөнхсоёл, Х.Тэмүүжин нарын хамт Бүгд Найрамдах Чех Улсад албан ёсны айлчлал хийлээ.

Айлчлалын хүрээнд Чех улсын Парламентын танхимын дарга Милош Вийстрчил, дэд дарга Йитка Сейтлова, мөн Төлөөлөгчдийн танхимын дэд дарга Патрик Нахер нартай уулзаж, хоёр улсын парламент хоорондын хамтын ажиллагааг өргөжүүлэх, байгаль орчин, сэргээгдэх эрчим хүч, эдийн засаг, бизнесийн хамтын ажиллагааг идэвхжүүлэх талаар санал солилцов.
Мөн Чех улсын техник, технологи, ноу-хауг Монгол Улсад нэвтрүүлэх, жижиг дунд үйлдвэрлэлийг дэмжихийн ач холбогдлыг онцоллоо.

Айлчлалын үеэр Чехийн бизнес эрхлэгчидтэй уулзаж, хамтын ажиллагааны боломжуудын талаар ярилцав. Түүнчлэн Монгол, Чехийн Засгийн газар хоорондын Эдийн засгийн хамтын ажиллагааны Хамтарсан хорооны IX хуралдаан 2026 оны 5 дугаар сард Прага хотноо зохион байгуулагдах талаар мэдээлэл өглөө.

Мөн Монгол, Чехийн харилцаанд хувь нэмэр оруулж буй иргэдтэй уулзаж, Прага дахь Монгол Улсын Элчин сайдын яамны үйл ажиллагаатай танилцав.

Чех улсын төр, засгийн зүгээс тус улсад ажиллаж, амьдарч буй Монгол иргэдийн аж байдалд анхаарал хандуулж, иргэдийн аюулгүй байдал, гэр бүл, хүүхдүүдтэйгээ хамт байх, сурч боловсрох боломжийг бүрдүүлэхэд дэмжлэг үзүүлж байгаад талархал илэрхийллээ.

Монгол–Чехийн парламентын хамтын ажиллагааг өргөжүүлнэ