УИХ-ын чуулганы /2026.05.08/-ны өдрийн хуралдаанаар “Монгол Улсын хөгжлийн 2027 оны төлөвлөгөө батлах тухай” Улсын Их Хурлын тогтоолын төслийг хэлэлцлээ.

Хэлэлцэж буй асуудлаар УИХ-ын гишүүн О.Номинчимэг сайд нарт асуулт тавьж, байр сууриа илэрхийллээ.

Эрхэм сайд нар аа төлөвлөгөө гэдэг бол мөрөөдлийн жагсаалт биш хариуцлагын гэрээ байх ёстой. 2027 онд 15,3 их наяд төгрөг зарцуулна гэжээ. Та бүхний 2025 оны төлөвлөгөөний биелэлт тал хувьдаа хүрч чадахгүй байгаа шүү. Ахин 15 их наядын төлөвлөгөө оруулж ирж байна. 2025 оны төлөвлөгөөний гүйцэтгэлийн тайлан дээр тэргүүлэх чиглэлийн үйл ажиллагааны гүйцэтгэл 48,5%-тай байсан. Бүх хөтөлбөрийн үр дүн 57,1%-тай байсан. Гол шалтгаан нь судалгаа тооцоололгүй төлөвлөлт гэж дүгнээд энэ тайландаа оруулсан байна. Алдаагаа давтаад ороод ирлээ.

1. Эдийн засаг, хөгжлийн сайд аа, 2025 оны төлөвлөгөөний биелэлт 50%-тай байхад 2027 оны төлөвлөгөөний үр дүн ямар үндэслэлээр 100% биелнэ гэж та төлөвлөж байна вэ?

2. ЗГХЭГ-ын сайдаас асууя. Манай улсын хувьд Дэлхийн банкны засаглалын индексийг тоон шалгуур үзүүлэлт ашигласан байна л даа. Хууль, авлига, засаглалтай холбоотой 6 индекс бий. Энэ индекс дотроос тогтмол буурч байгаа нь ерөөсөө төрийн ЗГ-ын үр дүнгүй байдал. Энэ үзүүлэлт ерөөсөө ахихгүй байгаа. Буурсаар сэхээний тасагт орохоос нь өмнө суурь өвчнийг нь анагаах реформ шийдлээ хийхгүй болбол барилга байгууламж бариад, арга хэмжээ зохион байгуулаад үр дүнгүй.

3. Эрүүл мэндийн сайдаас асууя. 2025 оны төлөвлөгөө дээр эх нялхсын эндэгдэл өссөн байсан. Үүнийг бууруулахын тулд ямар дорвитой арга хэмжээ авч байна вэ?

4. Хууль зүйн сайдаас асууя. Энэ шүүхийн шийдвэр гүйцэтгэлийг сайжруулах тоон үзүүлэлтээр ороод ирж байна. Гэхдээ хийх арга хэмжээ нь тодорхойгүй. Одоогийн байдлаар иргэний болон захиргааны хэргийн шүүхийн шийдвэр гүйцэтгэл үнэхээр шалдаа буусан. Хууль эрх зүйн реформ хийх хуулиа хурдан оруулж ирмээр байна.

О.Номинчимэг: Эрхэм сайд нар аа, төлөвлөгөө гэдэг бол мөрөөдлийн жагсаалт биш хариуцлагын гэрээ байх ёстой шүү!