УИХ-ын Төсвийн байнгын хороо, Эдийн засгийн байнгын хорооны хамтарсан хурлаар Татварын багц хуулийн төслийг хэлэлцлээ.

Хэлэлцэж буй асуудалтай холбогдуулан УИХ-ын гишүүн Г.Уянгахишиг дараах асуултыг тавьж, байр сууриа илэрхийллээ.

Татварын багц хууль хэрэгжүүлэх үед үүнийг хэрэгжүүлэх боломж нь бий юу? Бүртгэлийн системчлэл, буцаан олголтын дүн болохоор байгаа юу гэж асууж байснаа санаж байна. Болно гээд батлуулсан. Батлагдаад жил болоогүй, хэрэгжиж эхлээгүй хуулиа сурталчилж, иргэд олон нийтийн дунд маш том хүлээлтийг үүсгээд байгаа. Гэтэл хүчингүй болгох асуудлыг оруулж ирлээ. Хуулийн хүрээнд шинээр үүссэн нөхцөл байдал үүсээгүй байна. Засгийн газар, Ерөнхий сайд л өөрчлөгдсөн.

Парламент хууль баталж, тэр нь хэрэгжээд явах ёстой. Засгийн газар нь ч үйл ажиллагаагаа цааш үргэлжлүүлэх бодлоготой байх ёстой. Тэгэхээр ямар тооцоолол хийж үзсэний үндсэн дээр НӨАТ-ын буцаалтыг хүчингүй болгож байна вэ? Нөгөө талдаа ХХОАТ-ын хөнгөлөлтүүдийг оруулаад ирж байна. Тухайн Засгийн газрын Сангийн сайд, эсвэл Эдийн засаг хөгжлийн сайдын бодлого гэх үү, шинэ содон зүйл харуулах пи ар хийх гээд хуучнаа үгүйсгэх байдлаар явбал цааш ЗГ-ын бодлого яаж үргэлжлэх вэ?

10 сарын 1-нээс хэрэгжих боломжтой гэж үзсэн НӨАТ-ын буцаан олголтын дүн ямар болоод хэрэгжих боломжгүй болчихоод байна вэ? гэдэг тайлбарыг авмаар байна.

Түүний асуултад Эдийн засаг, хөгжлийн сайд Ж.Энхбаяр хариуллаа.

Төсвийн орлогын 20 хувийг НӨАТ бүрдүүлж байна. ЗГ НӨАТ-ын буцаалтын 20 хувийг 50 болгох хууль өргөн бариад иргэддээ худалдан авалтаар дамжуулаад дэмжье гэсэн бодлого орж ирсэн. Үүний өртөг зардал 1.8 их наяд төгрөгийн орлого төсвөөс хасагдаж иргэдэд үлдэнэ гэсэн үг. Ийм хууль өргөн барьж, төсөв хэлэлцэж байхад багш, эмч нарын цалингийн нэмэгдлийн асуудал орж ирсэн. Үүний нэмэгдэл 2 их наяд давчихлаа. 2027 онд 4 их наяд хүрнэ. Тооцоолж байсан зарлагын хэмжээ 2 дахин нэмэгдчихээр боломжгүй болчихож байна.

Г.Уянгахишиг: "Шинээр үүссэн нөхцөл байдал" бий болоогүй атал хэрэгжиж эхлээгүй НӨАТ-ын буцаалтыг 50-100 хувь хөнгөлөх хуулийг хүчингүй болгох гол шалтгаан юу вэ?