Үйл явдал2 мин унших
Засгийн газар бодлогын залгамж чанарыг хадгалж Оюутолгойн зээлийг хүүг бууруулах хэлэлцээг бодит үр дүнд хүргэлээ

Одоохон...
Үйл явдал2 мин унших

Ард түмэн, Засгийн газраа төлөөлөн хэлэлцээрийн ширээнд сууна гэдэг асар их хариуцлага шаарддаг ажил.
Хэлэлцээ гэдэг хэзээ ч нэг уулзалтаар шийдэгддэггүй. Нөгөө талын байр суурь, тактикийг зөв үнэлэх, өөрчлөгдөж буй нөхцөлд барьц алдахгүй байх, хамгийн гол нь улсынхаа эрх ашгийг тууштай хамгаалах шаардлагатай байдаг.
2025 оны 10 дугаар сарын 30-нд Оюу Толгойн төслийн зээлийн хүүг бууруулах албан ёсны хэлэлцээ эхэлж, түүнээс хойш таван удаагийн хэлэлцээний үр дүнд талууд зээлийн хүүг бууруулах шаардлагатай гэдэгт санал нэгдсэн.
УИХ-ын гишүүн Б.Жавхлан Сангийн сайдаар ажиллах хугацаандаа монголын талын ажлын хэсгийг ахалж байсан юм.
Тэрбээр "Бидний зорилго зээлийн хүүг багадаа 4 хувиар бууруулах байсан. Энэ зорилт бүрэн хэрэгжсэн бол Монголын талын үр өгөөж ойролцоогоор 10 тэрбум ам.доллараар нэмэгдэх боломжтой байв. Хэдийгээр зорилтоо бүрэн хэмжээнд хэрэгжүүлж чадаагүй ч олон сарын уйгагүй хөдөлмөр бодит ахиц авчирч, Монголын эрх ашгийг нэмэгдүүлэх чухал үр дүн гаргалаа.
Г. Занданшатарын Засгийн газрын үед эхлүүлсэн ажлыг Н. Учралын Засгийн газар үргэлжлүүлж, үр дүнд хүргэж чадсанд баяртай байна.
Энэ бол олон хүний мэдлэг, ур чадвар, тэвчээр, хамтын хөдөлмөрийн үр дүн. Хэлэлцээнд хүчин зүтгэсэн үндэсний экспертүүдээрээ бахархаж, ЗГХЭГ, Сангийн яам, Аж үйлдвэр, эрдэс баялгийн яам, Эрдэнэс Оюу Толгой ХХК, Эрдэнэс Монгол ХХК, Оюу Толгой компанийн ТУЗ-ийн гишүүд болон оролцсон бүх хүмүүст чин сэтгэлийн талархал илэрхийлье" гэв.