Байр суурь2 мин унших
41 их наядын төсөв батлахдаа яригдаагүй инфляц 3 их наядын ногдол ашиг иргэддээ өгөхөд асуудал уу?

Улсын Их Хурлын Өргөдлийн болон Эдийн засгийн байнгын хороо өнөөдөр (2026.11.17) хамтран хуралдаж, нийтийн ашиг сонирхлыг хөндсөн асуудлаарх иргэдийн өргөдлийг хэлэлцлээ.
Хуралдааныг Өргөдлийн байнгын хорооны дарга О.Номинчимэг удирдаж, ирц болон товыг танилцууллаа. Байнгын хороодын хамтарсан хуралдаанаар "Оюу толгойн ашиг болох 3 их наядаас иргэн бүрд 857,000 төгрөгийг хувь дансанд нь шилжүүлж өгөх асуудлаар хуулийн төсөл санаачлах" тухай нийтийн өргөдлийг судалж, санал, дүгнэлт боловсруулах үүрэг бүхий ажлын хэсэг байгуулах эсэх асуудлыг шийдвэрлэхээр товлосныг хуралдаан даргалагч мэдээлэв.
Ингээд хуралдаан даргалагч О.Номинчимэг нийтийн өргөдлийн шийдвэрлэлтийн явцыг нэг бүрчлэн илтгэлээ. Иргэн Хоролдоржийн Оюунбилэгээс www.d-urgudul.parliament.mn-д хуулийн төсөл санаачлан Улсын Их Хурлаар хэлэлцүүлэх тухай нийтийн өргөдлийг 2026 оны 10 дугаар сарын 14-нд ирүүлснийг Улсын Их Хурлын Нийтийн өргөдлийн системд тус сарын 23-ны өдөр нийтэлжээ. Тэрбээр өргөдөлдөө "Оюу толгойн ордоо 30 жил ашиглуулсны эцэст анх удаа Монгол Улс 3 их наядын ашиг авахаар болсон билээ. Монгол Улсын нийт хүн ам болох 3.5 сая иргэндээ хуваавал нэг иргэнд 857,000 төгрөг оногдож байна. Иймд иргэн бүрийн өөрсдийн хувь дансанд бэлнээр шилжүүлэх хуулийн төслийг санаачилж байна.
Хэрэв ингэж баттай болгохгүй бол VI цахилгаан станц барих гэх мэт хэзээ хийгдэх нь тодорхойгүй ажилд Оюу толгойн ашгаа төсөв болгож өгмөөргүй байна. Ийнхүү хуулийн төсөл санаачилж байгаа тул 100,000 иргэд маань гарын үсгээ зурж, Ерөнхийлөгчөөр баталгаажуулж ашгаа өөрсдөө захиран зарцуулъя" хэмээн уриалжээ. Уг өргөдлийг 10 хоногийн дотор 100,094 иргэн дэмжсэн байна. Энэхүү өргөдлийг дэмжигчдийг газар зүйн байршлаар ангилбал 49,785 нь нийслэлээс, бусад нь орон нутгаас болон бусад улс орноос ханджээ. Дэмжиж гарын үсэг зурсан тэдгээр иргэдийн олонх нь буюу 71,931 нь эмэгтэйчүүд ажээ. Дийлэнх хэсэг нь 20-44 насныхан байв.
УИХ-ын гишүүн О.Батнайрамдал, 17 жилийн дараа 3 их наяд төгрөгийг авчрах болсонд Засгийн газар, Ажлын хэсэгт талархаж буйгаа илэрхийлэв. Тэрбээр үүнд УИХ-ын Хянан шалгах түр хороо үүрэг гүйцэтгэсэн, энэ танхимд та бид жилийн өмнө Оюу толгойн асуудлаар сонсгол хийж, тогтоол баталсныг мартаж болохгүй. Эхнээсээ үр дүнгээ өгч байна. Ерөнхий сайд Н.Учрал тэргүүтэй Засгийн газрын хийсэн хэлэлцээр цаашдаа ч үр дүнтэй үргэлжлэх учиртай гэсэн юм.
