Үйл явдал2 мин унших
Морин эмчилгээ, заслыг Монголд эхлүүлэх 7 жилийн мөрөөдлийнхөө араас...

Одоохон...
Үйл явдал2 мин унших

Өчигдөр /2026.08.24/ УИХ-ын гишүүн О.Саранчулуун БНСУ-ын Korea Racing Authority (KRA)-ийн Ерөнхийлөгч, албаных нь хүмүүс болон моринд суурилсан эмчилгээ, сэргээн засах чиглэлээр ажилладаг профессор Cheol Kim болон бусад мэргэжлийн төлөөлөлтэй уулзаж, Монгол Улсад морин эмчилгээ (Equine Therapy)-г хөгжүүлэх боломж, эрэлхийлж санал солилцсон талаараа хуваалцсаныг хүргэж байна.

"Зорьсон нэг ажил маань. Морин эмчилгээ нь аутизм, ADHD, тархины саажилт, PTSD зэрэг тодорхой онош, бэрхшээлтэй хүмүүст зориулсан эмчилгээ, сэргээн засах арга төдийгүй хүн өөрийн бие, хөдөлгөөн, сэтгэл хөдлөлөө мэдрэх, тайвшрах, өөртөө итгэх, нийгэмтэй холбогдох боломжийг бий болгодог цогц арга юм.
Морьтой харилцах, хөдөлгөөн, хэмнэл, байгаль, амьтантай үүсэх холбоо нь зөвхөн эмчилгээ шаардлагатай хүмүүст бус, сэтгэл санааны ачаалал, стресс ихтэй, өдөр тутмын амьдралын дарамтад ордог хүн бүрт тайвшрах, өөрийгөө эргэн мэдрэх орон зай болж чаддаг юм.
Та бүхэн санаж байвал сэргээн засах дасгалын бөмбөг байдагдаа? Тэрэн дээр суугаад 2 талынхаа булчинг мэдэрч дасгал хийдэг дээ?
Тэгвэл морь унахад хүн өөрийн биеийн тэнцвэр, хөдөлгөөн, мэдрэмжээ илүү анзаарч, өмнө нь төдийлөн анхаардаггүй, эсвэл (харвалтын дараа) сэргээх булчин гэх мэт~ биеийнхээ нэг хэсгийг мэдэрдэг. Морин засал, эмчилгээний үнэ цэнэ зөвхөн “эмчлэх”-д биш, хүн өөрийн биеэ дахин мэдэрч, өөрийгөө ойлгоход оршдог гэсэн үг.
Монгол Улсад морин соёл, адууны уламжлал асар хүчтэй хэдий ч моринд суурилсан орчин үеийн эмчилгээ, сэргээн засах үйлчилгээг мэргэжлийн түвшинд хөгжүүлсэн тогтолцоо, ойлголт ч одоогоор алга байна.
Тиймээс энэ чиглэлийг Монголд нутагшуулахын тулд Солонгосын туршлага, судалгаа, мэргэжлийн боловсон хүчин, сургалт, арга зүй, стандарт болон практик туршлагыг Монголын нөхцөлд нэвтрүүлэх боломж хайж ирээд хайснаа оллоо.
Уулзалтын үеэр Монголд энэ чиглэлийг хөгжүүлэхэд Солонгосын талаас мэргэжлийн болон институцийн дэмжлэг үзүүлж, хамтран ажиллах хүсэлтээ илэрхийлсэн. Мөн Монголд туршилтын хөтөлбөр эхлүүлж, цаашид судалгаа, сургалт, мэргэжилтэн бэлтгэх, эмчилгээ-сэргээн засах төвийн загвар хөгжүүлэх боломжийн талаар ярилцлаа.
Монголын адуу, уламжлалт морин соёлд орчин үеийн анагаах ухаан, сэргээн засах шинжлэх ухаан, сэтгэлзүйн арга зүйг холбон Монголд өөрийн гэсэн Equine Therapy-ийн загвар бий болгох нь бодож явсан зүйл минь билээ. Бидний соёлын нэг хэсэг бол адуу байсаар ирсэн.

Харин одоо бид адуугаа хүний эрүүл мэнд, сэргээн засалт, сэтгэлзүйн сайн сайхан байдлыг дэмжих орчин үеийн шинжлэх ухааны нэг хэсэг болгон хөгжүүлэх боломжтой.