Онцлох мэдээ4 мин унших
Олон улсад нийцсэн, мэргэшсэн үйлчилгээ байх ёстой

Сэтгүүлч Munkhtuya_vip
Одоохон...
Онцлох мэдээ4 мин унших

Сэтгүүлч Munkhtuya_vip
Өнөөдрийн байдлаар аудитын компаниудын боловсон хүчний чадавхи, мэргэжлийн ур чадвар дээшилж, арга зүйн хувьд боловсронгуй болж байна. Үүний илрэл нь аж ахуйн нэгж, байгууллагуудын улирал жилийн санхүүгийн тайланг баталгаажуулж байгаа нь өмнөх байдлаасаа арга технологийн болон чанарын хувьд зохих түвшинд хүрээд байна.
Тиймээс “Аудитын тухай” хуулийн шинэчилсэн найруулгад мэргэшсэн нягтлан бодогч, аудиторын хариуцлага, аудитын байгууллагад тавигдах шаардлагыг өндөржүүлэх, тэр дундаа аудитын компани нь үндсэн орон тооны 4-5 аудитортой байх, заавал мэргэжлийн хариуцлагын даатгалд даатгуулах зэрэг зүйл заалт оруулах нь зүйтэй гэж зарим мэргэжилтнүүд саналаа хэлж байсан. Тэгвэл энэ оны эхнээс мөрдөж эхэлсэн шинэ хуульд ямар чухал зохицуулалт хийж өгсөн бол?
Олон улсын стандартад нийцсэн мэргэжлийн үйлчилгээ үзүүлэх, хараат бус байх, хараат бус байдлыг алдагдуулахад шахалт үзүүлэхээс зайлсхийх, харилцагчийн мэдээллийн нууцыг хадгалах, мэргэжлийн үл итгэх байр сууринаас хандана.
Нэгтгэсэн санхүүгийн тайлан гаргадаг, өөрчлөн байгуулагдаж, татан буугдаж байгаа, бүх хөрөнгөө дуудлага худалдаагаар худалдах, гадаадын хөрөнгө оруулалттай зэрэг аж ахуйн нэгж, байгууллага санхүүгийн тайландаа заавал аудит хийлгэх шаардлагатай.
Хэрэв хувьцаат компани бол жилийн эцсийн хувьцаа эзэмшигчдийн хурал болохоос хоёр долоо хоног, татан буугдаж байгаа бол түүнээс нэг сарын өмнө, банк бол жилийн эцсийн санхүүгийн тайланг дараагийн санхүүгийн жилийн гуравдугаар сарын 30-ны өдрийн дотор зэрэг хугацаанд эдгээр байгууллагууд санхүүгийн тайландаа аудит хийлгэсэн байх ёстой гэж тодорхой заажээ.
Шалгалтын явцад илэрсэн бүртгэл хөтлөлт болон санхүүгийн тайлантай холбоотой хүлээн зөвшөөрсөн алдаа, зөрчлийг шуурхай залруулах, аудитын үйл ажиллагаанд саад учруулахгүй, хөндлөнгөөс оролцохгүй, ямар нэгэн дарамт шахалт үзүүлэхгүй байх, аудиторын хүссэн нотлох баримтыг гуравдагч этгээдээс гаргуулж өгөх зэрэг үүрэгтэй.
Хуульд аудиторын эрх, үүргийг нийтлэг байдлаар тусгаж өгчээ.
Аудитын компани байгуулахад үүсгэн байгуулагч, хувьцаа эзэмшигч нь Монгол Улсын мэргэшсэн нягтлан бодогч байхаас эхлээд захирал, партнер нь мэргэшсэн нягтлан бодогчийн хугацаагүй эрхтэй, ажилчид дунд хоёроос доошгүй орон тооны хугацаагүй эрхтэй мэргэшсэн нягтлан бодогч байна гэж заажээ. Энэ болон бусад шаардлагыг хангасан тохиолдолд аудитын үйл ажиллагаа эрхлэх тусгай зөвшөөрлийг гурван жилийн хугацаатай олгох юм.
Энэ хугацаа дуусч, тусгай зөвшөөрлөө сунгах бол эдгээр жилүүдийн үйл ажиллагааны тайлан, ажиллагсадын жагсаалт, мэргэшсэн нягтлан бодогчийн мэргэжлийн ёс зүйн тодорхойлолт, бусад холбогдох баримт бичгийг санхүү, бүртгэлийн асуудал эрхэлсэн Засгийн газрын гишүүнд хүргүүлж, шийдвэрлүүлнэ.
Аудитын компанид тавигдсан тодорхой шаардлагыг зөрчсөн тохиолдолд сунгахгүй. Мөн тодорхой нөхцөл байдал үүссэн тохиолдолд үйл ажиллагаа эрхлэх тусгай зөвшөөрлийг гурван сар хүртэл хугацаанд түдгэлзүүлэх юм байна.
Аудитын үйл ажиллагааг олон улсын стандартад нийцүүлээгүй, аудитын баримтлах зарчмыг дагаж мөрдөөгүй, хуулиар зөвшөөрснөөс өөр үйл ажиллагаа эрхэлсэн аудитын компанийг хөдөлмөрийн хөлсний доод хэмжээг 20-200 дахин, албан тушаалтныг мөн хэмжээг 5-10 дахин нэмэгдүүлсэнтэй тэнцэх хэмжээний төгрөгөөр торгох юм.
Мөн аудитын компани нь үйлчилгээний хөлсөө бодит байдалд нийцүүлээгүй, тусгай зөвшөөрөл авсан аудитын хуулийн этгээд нь “Аудит” гэсэн үгийг оноосон нэрийн ард хэрэглээгүй тохиолдолд тухайн аудитын компанийн олсон орлогыг хурааж, албан тушаалтныг хөдөлмөрийн хөлсний доод хэмжээг 5 дахин нэмэгдүүлсэнтэй тэнцэх хэмжээний төгрөгөөр торгоно.