УИХ дахь Монгол Улсын Их Хурлын Хүний хөгжил, нийгмийн бодлогын байнгын хороо (2025.09.30)-ний өдөр хуралдлаа. Уг хуралдаанаар Эрүүл мэндийн даатгалын үндэсний зөвлөл (ЭМДҮЗ)-ийн 2024 оны үйл ажиллагааны тайлан, ажлын хэсэг байгуулах тухай Байнгын хорооны тогтоолын төсөл, Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл болон Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүдийг хэлэлцлээ.
УГ асуудалтай холбогдуулан УИХ-ын гишүүн А.Ганбаатар асуулт асууж, байр сууриа илэрхийллээ.
Ерөнхий сайд "хүн бол мега төсөл" гээд зарласан, тунхагласан. Зарим нэг төсвийг харахаар "хүн бол мега төсөл биш, сега тоглоом" шиг болчих гээд байна. Тухайлбал 2024 онд Соёл, спорт, аялал жуулчлалын салбартаа 145 тэрбумыг зарцуулж байсан юм байна. Одоо 52,8 гээд 3 дахин багассан ороод ирсэн. Энэ салбарууд бол нийгмийн зөөлөн хүчийг хангаж байдаг, хүний хөгжлийг дэмжиж байдаг салбарууд. Хүнийхээ төлөө буюу хүнийг бодлогоор дэмжих салбарын төсвийг ямар их танасан юм бэ! Салбарын сайд, салбарын төрийн нарийн, газрын дарга нар сайддаа хэлж энэ төсвөө хамгаалдаггүй юм уу? Хүнийхээ төлөө “төсөв” дээр ямар ч бодлого бариагүй байна.
Тухайлбал хэдэн жишээ хэлье. Залуучуудын салбарынх нь төсөв дээр тавхан тэрбум тавьчхаад 90%-ийг нь хасчихсан юм байна. Тусгай олимп гэж бид мэднэ. Хүн эхээс төрсөн байдлаараа үл ялгаварлагдах ёстой. Гэтэл энэ төсвийг нь бүгдийг нь хасчихсан байна! Залуучууд гар утас, цахим залинд ихээхэн өртөж байна гэдэг...Гэтэл цахим кибер аюулгүй байдалтай тэмцэх 4 тэрбумын 90%-ийг нь хасчихсан байна. Мөн идэвхтэй амьдралын хэвшлийг дэмжих бусад спортын төсвөөс 90%, түүхэн дурсгалаа хамгаалах төсвөөс 5 тэрбум байсныг нь бүгдийг нь хасчихсан гэх мэт.
Төсвийн тогтвортой байдлын зөвлөлөөс төсөв зарцуулалтаа зөв эрэмбэлээрэй гэж байсан. Үүнийг бол бүрэн алдсан байна. Хүний хөгжлийнхөө салбарт төсвөө тусгаагүй байна. Үүн дээр Хүний хөгжил, нийгмийн бодлогын байнгын хорооны гишүүд дэмжээд буцаж босгох боломж байдаг юм уу?