УИХ-ын чуулганы /2026.04.09/-ний өдрийн нэгдсэн хуралдаанаар Санхүүгийн хоршооны тухай хууль /шинэчилсэн найруулга/-ийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцлээ.

Хэлэлцэж буй асуудалтай холбогдуулан УИХ-ын гишүүн П.Сайнзориг асуулт асууж, байр сууриа илэрхийллээ.

Иргэдэд санхүүгийн үйлчилгээ авах хэрэгцээ шаардлага өдөр тутам гарч байгаа. Банк, ББСБ, ХЗХ, Ломбард, хувь иргэдээс авч байна. Үүнд Санхүүгийн зохицуулах хороо хүрч ажиллаж байгаа нь эргэлзээтэй. Орон тоо, орон нутагт салбартай эсэхээс эхлээд. Хэрэглээний зээлийн хүүгийн таазыг хуулиар тогтоож өгч болдог. Гэтэл тэр заалтыг ҮХЦ-д өгчихөөд гацааж байгаа. Үүний цаана ямар эрх ашиг яваад байна вэ? СЗХ энэ хуулийн хэрэгжилтийг хангах тал дээр юу хийж байна?

Ломбард болон зах худалдааны төвүүд дээр цүнхтэй мөнгө барьчихаад лангуу түрээслэгчдэд маш өндөр хүүтэй зээл өгч, зээлийн шарк ажиллуулж, боолчилж байна.

Хадгаламж зээлийн хоршоо нь ашгийн төлөө бус хуулийн этгээд. Иймд илүү үйл ажиллагааг нь тэлж нэмэлт үйлчилгээнүүд худалдаж авах жишиг рүү орж байгаа нь хэр зохистой вэ? Бидэнд энэ талаарх гашуун түүхүүд бий. Хуулийн төслийг огт эсэргүүцээгүй. Гэхдээ эдгээр асуудлуудыг хэр бодитоор үнэлж байгаа вэ?

Дэлхийн загвар хуулиас иш татсан байгаа юм. Тайландад аялал жуулчлал, хоолны экспортын чиглэлд үйл ажиллагаа явуулдаг газруудаа дэмждэг. Гэтэл манайд хэрэглээнд л яваад байгаа юм. Энэ нь бас л зээл. Энэ тийм өнөө, маргаашгүй батлах шаардлагатай асуудал мөн үү?

П.Сайнзориг: Ломбард, зах, худалдааны төвүүд дээр цүнхтэй мөнгө барьж, зээлийн шарк ажиллуулан лангуу түрээслэгчдийг "боолчилж" байна!