Үйл явдал1 мин унших
Баянголын өндөрлөгийн 10 га газарт цэцэрлэгт хүрээлэн байгуулна

Баянгол дүүргийн 3, 4 хорооллын арын өндөрлөгт байрлах Зүүн Нарангийн гудамж орчмын 10 га талбайг чөлөөлж, ногоон байгууламжтай цэцэрлэгт хүрээлэн байгуулахаар болжээ. Тухайн бүсийг дахин төлөвлөж, орон сууцжуулах хөтөлбөр хэрэгжүүлэх бөгөөд газар чөлөөлөлтөд 105 орчим нэгж талбар чөлөөлөх тооцоо гарчээ.
Чөлөөлөгдөх талбарын 95 гаруй нь зөвшөөрөлтэй аж. Газар зохион байгуулалтын ажлын явцад өмчлөл, ашиглалтын асуудлыг цэгцлэх, чөлөөлөлтийн хүрээнд үнэлгээ, зөвшилцлийн шат дарааллыг мөрдөх шаардлага үүсч буйг албаныхан тайлбарлалаа.
Өчигдрөөс айлуудад газар чөлөөлөлтийн талаар мэдэгдэл хүргүүлж эхэлсэн байна. Цаашдын ажиллагааг хууль, журмын дагуу зохион байгуулна гэдгийг холбогдох байгууллагууд онцолжээ.
Газрын тухай хуульд зааснаар Нийслэлийн Газар зохион байгуулалтын алба хашаа, байшинг үнэлэх хөндлөнгийн байгууллагыг сонгон шалгаруулах юм байна. Албан тайлбарт ирэх долоо хоногт үнэлгээний байгууллагыг сонгон шалгаруулж, үүний дараа айлуудтай зөвшилцөж эхэлнэ гэж дурджээ.
