#Коммент3 мин унших
УИХ-ын гишүүн Р.Сэддорж Дундговь аймагт ажиллаж, иргэдийн санал бодлыг сонсон, цаг үеийн асуудлаар мэдээлэл солилцон ажиллаж байна

УИХ-ын гишүүн тойргийнхоо нийгмийн асуудлыг шийдвэрлэхэд гар бие оролцож, иргэдийнхээ санаа бодлыг сонсож, тэдний дуу хоолойг УИХ-д хүргэх нь гишүүдийн ажлын салшгүй нэг хэсэг юм.
Энэ хүрээндээ УИХ-ын гишүүн Р.Сэддорж УИХ-ын дэд дарга Б.Пүрэвдорж, УИХ-ын гишүүн Ц.Мөнхбат нарын хамтаар Дундговь аймагт ажиллаж, иргэдтэй уулзан тэдний санал бодлыг сонсон, цаг үеийн асуудлаар мэдээлэл солилцон ажиллаж байна.
ДУНДГОВЬ АЙМГИЙН САЙХАН-ОВОО СУМ
Онгийн голын хөвөөнд орших, Өвөрхангай болон Өмнөговь аймгийн сумдтай хил залган байрладаг Сайхан-Овоо сумынхаа иргэдтэй уулзаж, санал бодлыг нь сонсон, цаг үеийн асуудлаар мэдээлэл солилцлоо.
Уулзалтаар Р.Сэддорж гишүүн УИХ-д санаачлан ажиллаж буй хууль тогтоомжийн өөрчлөлт, говийн бүс нутгийн хөгжил, тэр дундаа усны асуудал, гадаргын усыг говьд хүргэх төслийн ач холбогдол, усны эрх зүйн орчны шинэчлэлийн талаар байр сууриа илэрхийлж, мэдээлэл өглөө.
Мөн улс орны улс төр, нийгэм, эдийн засгийн өнөөгийн нөхцөл байдал, цаг үеийн асуудлаар ярилцаж, иргэдийн сонирхсон асуултад хариуллаа.
Сайхан-Овоо сумын хувьд энэ жилийн зуншлага тааруу байж, малчид отор нүүдэл хийх нөхцөл байдалтай тулгарсан. Өвлийн цас хэдийнэ бууж, малчдын хувьд өвөлжилт, хаваржилтын бэлтгэл, бэлчээр, ус хангамж, малын тарга хүч зэрэг олон асуудал анхаарал татаж буй нь уулзалтын үеэр ч хөндөгдлөө.

УИХ-ын гишүүн Р.Сэддорж "Уул уурхай түшиглэсэн бус, мал аж ахуй, байгаль цаг уурын нөхцөлөөс амьжиргаа нь шууд хамаардаг энэ нутгийн иргэдийн асуудалд бодлогын түвшинд анхаарах нь чухал юм.Нутгийн иргэдийн санал хүсэлт, амьдрал дээр тулгарч буй асуудлыг сонсож, хууль тогтоох байгууллагын түвшинд хөндөх, холбогдох бодлого, шийдвэрт тусгуулахын төлөө ажиллана. Иргэдтэйгээ уулзаж, сонсож, санал бодлоо солилцох нь ажлын салшгүй хэсэг юм"гэв.
ДУНДГОВЬ АЙМГИЙН ХУЛД СУМ
Хулд сумын иргэдтэй уулзаж, цаг үеийн мэдээлэл хүргэн, санал хүсэлтийг нь сонслоо. Уулзалтын үеэр сумын удирдлагаас орон нутгийн өдөр тутмын үйл ажиллагаанд тулгамдаж буй хэд хэдэн асуудлыг танилцууллаа.
Тухайлбал, сумын Засаг даргын Тамгын газар албаны автомашингүй байгаа, сумын төвийн авто замын асуудлыг шийдвэрлэх шаардлагатай байгааг онцолж, эдгээр асуудлаа УИХ-ын гишүүдэд албан бичгээр уламжилсан юм.
Мөн уулзалтад оролцсон иргэд өөрсдийн санал бодол, хүсэлт, орон нутагт шийдвэрлэх шаардлагатай асуудлуудаа илэрхийллээ.
Хулд сум нь хот хоорондын авто замын дагуу байрладаг сумдын нэг. Иймд авто замын засвар, арчлалт, үйлчилгээний хүртээмжийг сайжруулах, зам дагуух газар ашиглалт, дэд бүтэц зэрэг асуудалд онцгой анхаарах шаардлагатайг ярилцлаа.

ДУНДГОВЬ АЙМГИЙН ДЭЛГЭРХАНГАЙ СУМ
Гишүүд нутгийн иргэдтэй уулзаж, цаг үеийн асуудал, 2026 онд хийж хэрэгжүүлсэн ажил болон ирэх оны улсын төсвийн талаар мэдээлэл өгч, иргэдийн санал хүсэлтийг сонслоо.
Мал аж ахуй нь сумын эдийн засаг, өрхийн амьжиргааны гол тулгуур болсон Дэлгэрхангай сумын иргэдийн хувьд хүүхдийн боловсрол, нийгмийн үйлчилгээний хүртээмж чухал асуудал юм. Ирэх оны улсын төсөвт цэцэрлэгийн барилгын өргөтгөлийг тусган шийдвэрлэсэнд талархаж буйгаа иргэд илэрхийлэв.
Мөн сумын төвийн авто замтай болох, ЗДТГ-ын барилгын зураг төсвийг шинээр боловсруулж, орчин үеийн шаардлага хангасан барилгатай болох зэрэг саналаа уламжиллаа.

