Энэ жил УИХ-ын тухай хуульд өөрчлөлт орсонтой холбоотой,Намрын ээлжит чуулган эхлэх хугацааг наашлуулж, 9 дүгээр сарын 15-ны өдрөөс эхлүүлж, төсвийн төслийг хэлэлцэх хэлэлцүүлгийн үе шатыг шинээр нэмж 4 байсныг 5 үе шаттай болгож өөрчилсөн. Ингэснээр Улсын Их Хурлын гишүүд тойрогтоо төсвийн төслийг мэргэжлийн байгууллага, ард иргэдийн дунд олон талын оролцоог хангаж, илүү нухацтай хэлэлцэх эрх зүйн орчин бүрдэж чадсан гэж үзэж байгаа. Түүнчлэн Засгийн газраас /2025.09.01/-ний өдөр 2026 оны Төсвийн тухай хуулийг өргөн барьсан.

Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд нэгдсэн төсвийн тэнцвэржүүлсэн орлогын доод хэмжээ болон нийт зарлагын дээд хэмжээг 33,4 их наяд төгрөг байхаар баталсан ч дэлхийн эдийн засгийн тодорхой бус нөхцөл байдлаас шалтгаалж, дээрх дүн хангагдахгүй байх эрсдэл үүссэн. Тиймээс Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийг боловсруулжээ.

Уг хуулийн төсөлд эдийн засгийн бодит өсөлт 2026 онд 5,7 хувь, 2027 онд 6,3 хувь, 2028 онд 6,5 хувь байхаар тооцсон байна. Ирэх оны төсвийн төслийг Засгийн газар анх удаа иргэдийн саналд тулгуурлан боловсруулж, 186 мянган иргэний саналыг E-Mongolia цахим системээр, төсвийн ерөнхийлөн захирагч бүр олон нийтийн хэлэлцүүлэг хийж, 239 мянга орчим хүнийг оролцуулсан. Давхардсан тоогоор 8.8 мянган санал ирүүлсэн нь төсвийн үйл явцад иргэдийн оролцоог өргөн хүрээнд хангаж чадсан хэмээн Монгол Улсын Ерөнхий сайд танилцуулсан.

Түүнчлэн, 2026 оны төсвийн төслийг иргэдийн оролцоотой, ил тод, хүний хөгжлийг дэмжсэн, төсвийн тэлэлтийг хязгаарласан төсөв хэмээн тодорхойлоод буй.

Эрүүл мэндийн салбарын хөрөнгө оруулалтыг 5,5 дахин нэмэгдүүлж 1,3 их наяд төгрөгт хүргэв.

“Хавдар судлалын үндэсний төв”-2
“Төвийн бүсийн нэгдсэн эмнэлэг”
“Зүрх судасны үндэсний төв”
“Аймгуудын яаралтай түргэн тусламжын төв”

Боловсролын салбарт 1 их наядын хөрөнгө оруулалт хийж, хөрөнгө оруулалтыг 2 дахин нэмэгдүүлэв.

117 сургууль, 73 цэцэрлэг, 32 дотуур байр шинээр баригдана.
Боловсролын салбарын хувьсах зардалыг 100 тэрбумаар нэмэгдүүлэв.
Ахмадын тэтгэврийг 6 хувиар нэмэгдүүлэхэд зориулж 378.0 тэрбум төгрөг төсөвлөв.
Эрчим хүчний салбарт 3,9 их наяд төгрөгийн хөрөнгө оруулалт хийж, хүчин чадлыг 1,933 мвт-аар нэмэгдүүлнэ.

Эрдэнэбүрэн УЦС, Тосонцэнгэл-Их Уул чиглэлийн цахилгаан дамжуулах агаарын шугамыг барьж байгуулна.

2026 онд 3100 км автозам, 1300 м гүүр барина.
Төсвийн нийт орлогыг 2026 онд 34.9 их наяд төгрөгт, төсвийн тэнцвэржүүлсэн орлогыг 31.6 их наяд төгрөгт хүргэнэ.
Ирээдүйн өв сангийн хөрөнгийг 240.3 тэрбум төгрөг, Хуримтлалын сангийн хөрөнгийг 156.0 тэрбум төгрөгийн хөрөнгө оруулалтын хүүгийн орлогоор тус тус өсгөж арвижуулна.
Ирэх оны 1 сарын 1-нээс 1 сая хүртэл төгрөгийн худалдан авалтын НӨАТ-ын 5 хувийг буцааж олгоно.
Боомтуудын хүчин чадлыг 2-3 дахин нэмэгдүүлнэ.
Төрийн албаны орон тооны тэлэлтийг хязгаарлан, 2025 оны тодотголын түвшнээс нэмэгдүүлэхгүй

ТӨК-ийн 108 компанийг 70 хүртэл бууруулах бодлого баримтална

Монгол Улсын Засгийн газар 2026 онд төсвийн тогтвортой байдлыг хангаж, төсвийн зардлын өсөлтийг хязгаарлах, иргэдийн орлогыг нэмэгдүүлэх, нийгмийн суурь үйлчилгээний чанар, хүртээмжийг хүрсэн түвшнээс бууруулахгүй, ахиулан сайжруулахад чиглэж ажиллана. Ингэхдээ иргэдээс ирүүлсэн саналд үндэслэн боловсрол, эрүүл мэнд, нийгмийн даатгал, халамж, эрчим хүч, татварын буцан олголт зэрэг долоон чиглэлд түлхүү анхаарна гэдгийг онцлоод байна.

Төсвийн зардлын өсөлтийг хязгаарлах, иргэдийн орлогыг нэмэгдүүлэхэд анхаарч 2026 оны төсвийг боловсруулсан