Байр суурь2 мин унших
О.Номинчимэг: Монголбанк цахим зээл дэх чанаргүй зээлийн хувь хэмжээ өсөж, эрсдэлийг нь нэмэгдүүлж буй шалтгааныг тогтоож, зохицуулах шаардлагатай!
Сэтгүүлч Б.Цэцэгсүрэн
Одоохон...
Байр суурь2 мин унших
Сэтгүүлч Б.Цэцэгсүрэн
УИХ-ын гишүүн О.Номинчимэг:
Парламент дээр анхаарлын улс төр их давамгайлаад, зарим гишүүд бодлогын мэтгэлцээн, бодлогын асуудал гэхээсээ илүү камерт зориулж үг хэлдэг болсон байна.
Миний хувьд С.Наранцогт нэр дэвшигчийг дэмжиж байна. Гэхдээ 3 тодорхой асуулт тавья!
1. Манай улсад зээлийн хүү өндөр, хүртээмж муу байгаа бүгд ярьж байгаа. Үүний голлох шалтгаан нь инфляц гэдгийг бүгд хүлээн зөвшөөрч байгаа. Инфляцын түвшин, бодлогын хүү өндөр байна. Одоо Монголбанкны бодлогын хүү 12%, хэрэглээнд гарч байгаа зээлийн хүү 17, 18 цаашлаад 20 хувь. Тэгэхээр бодлогын хүү болон зээлийн хүүгийн ялгаа 5-8%-ийн зөрөөтэй байна. Гэтэл өндөр хөгжилтэй улсуудад 2-оос 3 хувь. Бодлогын хүүтэйгээ маш ойрхон явж ирдэг. Энэ ялгаа юунаас болж байна вэ?
Макро тогтворгүй байдал, эрсдэл, Валютын ханшийн эрсдэл, уул уурхайн мөчлөгийн эрсдэл нь хэдэн хувь гэж бодож байна?
Иргэний хэргийн шүүхийн шийдвэр гүйцэтгэл муу, хууль эрх зүйн орчны шинэчлэл хийгдэхгүй байгаатай холбоотой эрсдэл нь хэдэн хувь гэж харж байна? УИХ ч гэсэн арга хэмжээ авах ёстой. Тэгэхээр УИХ-ын зүгээс бодлогын хүү болон зээлийн хүүгийн ялгаа заагийг багасгахад, иргэддээ хямд хүүтэй зээлийг олгоход ямар эрх зүйн, бодлогын дэмжлэг хэрэгтэй гэж та үзэж байна?
2. Бизнес эрхлэгчдийн дунд Факторингийн үйлчилгээ гэж бий. Энэ нь нийлүүлэлтийн санхүүжилтийн маш чухал хэлбэр. Тэгтэл одоогийн нөхцөл байдал дээр факторингийн үйлчилгээний эрсдэл энгийн зээлийн эрсдэлээс өндөрт тооцогдож байна. Ийм учраас хүртээмж багатай, бизнес эрхлэгчдийн дунд зээлийн төрөлжсөн үйлчилгээ болж хөгжиж чадахгүй байна. Тэгэхээр нийлүүлэлтийн сүлжээний санхүүжилтийн чухал хэрэгсэл факторингийг банкнууд хөгжүүлэхэд одоогийн активын ангиллын журам дээр юу саад болж байна вэ?
Монголбанканд энэ чиглэл дэх зохицуулалтыг эргэж харах бололцоо байгаа юу?
3. Хэрэглэгчийн эрх ашиг талаас асуумаар байна. Банкны үйлчилгээнд зээл, төлбөр тооцооны үйлчилгээ дээр хурдан цахим зээлийн үйлчилгээ нэмэгдэж, хүртээмжийн сайжруулалт хийгдэж байгаа. Гэхдээ энэ цахим зээл, төлбөр тооцооны бүтээгдэхүүн үйлчилгээтэй холбоотой хэрэглэгчийн эрхийг хамгаалах асуудал нэлээн яригддаг. Нөгөө талаасаа банк санхүүгийн байгууллагын эрсдэлийг бууруулах зохимжтой арга нь юу вэ гэдэг асуудал яригдаад байгаа. Сүүлийн үед банкнуудын олгож байгаа цахим зээлийн чанар бусад зээлтэй харьцуулахад чанаргүй зээлийн хувь хэмжээ нэлээн өсөөд байгаа юм байна. Тэгээд энэ эргэн төлөлт харьцангуй муу байгаад байна. Тэгэхээр энэ дээр цахим зээлийн эрсдэл өндөр байгаа шалтгааныг та юу гэж ойлгож байна? Энэ талаар төв банкны зүгээс юу хийх ёстой вэ?